Беларус 4 (50) 1954

Не адбіраць, а дамагацца правоў народам. Справа сяброўства Беларусі й Украіны у Задзіночаных Нацыях. Сярод амэрыканскага грамадзянства, а навет і палітыкаў можна сустрэцца з крытыкаю факту ўвядзеньня ў Задзіночаныя Нацыі ў часе закладзінаў у Сан Францыска, як сяброў-закладчыкаў, Беларусі й Украіны (БССР й УССР). Уздыймаюцца навет галасы, няраз і ў Кангрэсе, з дамаганьнем адабраць гэтым рэспублікам права на сяброўства ў ЗН, каб гэтым зьменшыць лік галасоў савецкага блёку. За галоўную прычыну на гэта падаецца агульна ведамы факт, што дзяржаўная сувэрэннасьць гэтых двох народаў сяньня фікцыйная, толькі намінальная. Гэтым дзьвём рэспублікам забаронена ўтрымваць дыплёматычныя сувязі зь іншымі дзяржавамі, забаронена пасылаць за межы ці ўпускаць да сябе акрэдытаваных прадстаўнікоў іншых дзяржаваў, забаронена мець свае асобныя вайсковыя фармацыі, хоць у канстытуцыях гэтых дзяржаваў і гаворыцца пра сваё войска ды пра свае міністэрствы замежных справаў.

• Месца выхаду: New York
• Дата выхаду: 1954-12-20
• Выдавец: Беларуска-Амэрыканскае Задзіночаньне ў ЗША
• Кнігазбор: Kamunikat.org