Другі дзень фестывалю “Прадмова”

Наведвальнікаў «Прадмовы» зацікавіла назва зборніка Алеся Аркуша. На гэтае пытанне адказвае сам аўтар кнігі:

— Я падумаў, што мушу вершы сабраць пад адну вокладку, і калі я гугліў гэтыя вершы, манітараваў у інтэрнэце і ў сябе ў «Фэйсбуку», я знайшоў верш «Чаму праўда такая слабая?». Калісьці ён даўно друкаваўся ў газеце «Наша Ніва», мо ў дзясятых ці нават нулявых гадах. І мне падалося, што гэты верш вельмі актуальны для сённяшняга часу. І я па назве гэтага верша назваў і кнігу.

Таксама ў праграме другога дня было шмат дыскусій вакол кніг, выдавецтваў і нават пра тое, як творчасць дапамагае перажыць палітычнае зняволенне.

Паводле прадстаўніцы праваабарончага цэнтра «Вясна» Марыны Кастылянчанка, творчасць сапраўды дапамагае людзям за кратамі. Яны пра гэта самі кажуць, калі выходзяць.

— Актыўна, напрыклад, дзеляцца гэтымі творамі, ці іх прадастаўляюць на выставы. І гэта пра тое, як людзі адгукаюцца на той запыт, каб падзяліцца сваімі творчымі працамі. А па-другое, гэта і пра тое, як супрацоўнікі сістэмы пакарання дзейнічаюць у дачыненні да палітвязняў. Як толькі яны бачаць вось гэтую актыўнасць, што палітвязні малююць, яны пачынаюць наўпрост забараняць людзям маляваць ці, напрыклад, абмяжоўваць іх у часе, каб яны не маглі гэтага рабіць.

«Прадмова» ў Вільні праходзіць на дзвюх пляцоўках. Другі дзень на пляцоўцы клуба «Павільёніс» скончыцца прэзентацыяй аўтабіяграфічнага рамана «Яблык у валізцы» з удзелам аўтара Уладзіслава Наважылава а ў Беларускім музеі імя Івана Луцкевіча ўвечары пакажуць спектакль «Сумны суп» тэатра «Прыехалі» (па творах Вольгі Гапеевай).

Праграму фестывалю можна паглядзець ТУТ.

Цалкам матэрыял — у далучаным гукавым файле!