“Дзеці Аліндаркі” Альгерда Бахарэвіча выйшлі па-ўкраінску

2025-12-05 10:00

Раман Альгерда Бахарэвіча «Дзеці Аліндаркі» (2014) выйшаў ва ўкраінскім выдавецтве «Стилос». Пераклад здзейснілі Лэсік Панасюк і Дарына Гладун. Гэта першая кніга Альгерда Бахарэвіча на ўкраінскай мове.

«А ўкраінская мова — чацвертая (ці нават пятая), на якой існуе гэты раман», — дзеліцца навіной у сацсетках сам аўтар і дзякуе ды віншуе ўсіх, хто спрычыніўся да з’яўлення навінкі.

У 2014 «Дзеці Аліндаркі» выйшлі ў выдавецтве «Галіяфы» ў Менску і атрымалі прэмію «Кніга году» і трэцюю прэмію Гедройця. У 2018 раман выйшаў па-французску ў выдавецтве Le ver a soi ў перакладзе Алены Лапатнёвай пад рэдакцыяй Віржыні Шыманец.

У 2020 — па-ангельску ў перакладзе Джыма Дынглі ў шатландскім выдавецтве Scotland Street Press (з элемэнтамі скотс ад паэткі і перакладчцыцы Пэтры Рыд). У 2022 ангельскі пераклад выдалі ў ЗША New Directions. У 2024 годзе раман па-беларуску перавыдала выдавецтва «Янушкевіч».

Украінскі пераклад з’явіўся пры падтрымцы праграмы Еўразвязу «Дом Еўропы».

Крыніца: Міжнародны саюз беларускіх пісьменнікаў

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк