Фрашкі Севярына Квяткоўскага «Мы ідзём на Марш!» у свабодным доступе да пяцігоддзя Беларускай Рэвалюцыі

З нагоды пяцігоддзя Беларускай Рэвалюцыі аўтар кнігі Севярын Квяткоўскі дорыць суайчыннікам магчымасць спампаваць свой новы зборнік кароткай прозы «Мы ідзём на Марш!» у фармаце ePub.

Аповесць-фрашка «Мы ідзём на Марш!», якая дала назву кнізе, – гэта творчае падсумаванне першага перыяду жыцця незалежнай Рэспублікі Беларусь. Аўтар мяркуе, што ад 9 жніўня 2020 году пачалася новая эра гісторыі Беларусі.

Слова «фрашка» ў сучасным значэнні — аднагодак незалежнай Беларусі. У 1991 годзе Сяргей Дубавец заснаваў інтэлектуальнае выданне «Наша Ніва» (1991–2000), якое на ідэі беларушчыны ядналася з аднайменнай газетай пачатку ХХ ст.

У рэдацыйнай працы Сяргей Дубавец, сярод іншага, прапанаваў словам «фрашка» называць кароткую літаратурную форму з дыяпазонам — ад замалёўкі да міні-апавядання. Вясёлую ці сумную, але заўсёды іранічную.

Севярын Квяткоўскі (нар. 30 сакавіка 1973 года, Менск)

Сам для сябе прыдумаў азначэнне «медыяпісьменнік»: кожны літаратурны жанр, які выкарыстоўвае аўтар, наўпрост ці ўскосна звязаны з медыямі.

Севярын Квяткоўскі — аўтар кніг «Фрашкі да пляшкі», кароткая проза (2007), «Падарунак для Адэлі», навелы (2012), «Як стаць беларусам», дакументальны праект (2014) і «Каларадская пушча», сатырычны раман-серыял (2019).

Загалоўная аповесць новых фрашак «Мы ідзём на Марш!» сатканая з сапраўдных гісторый рэальных людзей, аб’яднаных фізічным і вобразным рухам супраць плыні абыякавасці, неадукаванасці, а часам адкрытай варожасці.

Самотныя нібыта людзі са сваімі ідэаламі ўрэшце сустракаюцца разам у адным бясконцым Маршы радасці і свабоды!

Севярын Квяткоўскі будзе ўдзячны за данаты:

Польшча blik: +48 501090720 з пазнакай «darowizna»

Revolut: @sieviaivtt