Ляйпцыг: пераклад “Я з вогненнай вёскі…” атрымаў прэмію Ляйпцыгскага кніжнага кірмашу

Кніга выйшла па-беларуску 50 гадоў таму і змяшчае сведчанні відавочцаў масавых забойстваў у беларускіх “вогненных вёсках” падчас Другой сусветнай вайны.

Журы высока ацаніла кнігу Томаса Вайлера, адзначыўшы, што “выказванні вяскоўцаў, якія амаль не магчыма сабе ўявіць, упершыню сталі даступнымі нямецкаму чытачу “. “Пераклад вусных выказванняў выкрывае жудасную жорсткасць перажытага, і выяўляе абмежаванасць мовы ў пякучай праўдзе гэтых сведчанняў”, — тлумачыць журы прэміі свой выбар.

Як раней расказваў Bellit.info, летась Томас Вайлер быў уганараваны прэміяй Паўля Цэлана за працу на ніве перакладу, перадусім за перастварэнне “Сабакаў Эўропы” Альгерда Бахарэвіча. Але таксама за тое, што дзякуючы яму “нямецкамоўны чытач мае магчымасць знаёміцца з малавядомай яму беларускай, польскай і расейскай літаратурай праз творы Артура Клінава, Віктара Марціновіча, Вольгі Гапеевай, Земавіта Шчэрэка (Ziemowit Szczerek), Аляксандры Літвіной, Юлі Цімафеевай і інш. Жанры ягоных перастварэнняў вар’іруюцца ад складанай прозы ды нетрывіяльнай дзіцячай літаратуры, сягаючы далікатнай паэзіі”.