Народная воля 56 (4616) 2021

Алег Груздзіловіч пасля вызвалення з турмы на Акрэсціна сказаў, што застаецца падазраваным і што ён даў падпіску аб яўцы. Тры дні ён галадаў за кратамі ў знак пратэсту супраць затрымання і салідарнасці з Інай Студзінскай, якая галадала больш за тыдзень з патрабаваннем дапусціць да яе адваката. Алег Груздзіловіч паведаміў пасля вызвалення, што мае статус падазраванага па артыкуле 342 Крымінальнага кодэксу (Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх; караюцца арыштам, ці абмежаваннем волі на тэрмін ад двух да пяці гадоў, або пазбаўленнем волі на тэрмін да чатырох гадоў). Ніводнага допыту ў Алега не было, ён адмовіўся даваць паказанні падчас затрымання, не падпісаў пратакол ператрусу 16 ліпеня. У Следчым камітэце 16 ліпеня яго спрабавалі дапытаць, але ён адмовіўся ад дачы паказанняў. “У Следчым камітэце ў кабінетах усё завалена кампутарамі і бел-чырвона-белай сімволікай. Там мне прапанавалі допыт, але я адмовіўся. Дзяжурны адвакат, якога мне далі, так і не паведаміў жонцы, што мяне накіравалі ў турму на Акрэсціна, аб чым я яго прасіў”.

• Месца выхаду: Мінск
• Дата выхаду: 2021-07-27
• Рэдактар: Сярэдзіч Іосіф
• Copyright: © 2021 by Народная воля
• Кнігазбор: Kamunikat.org