Навука 34 (2865) 2021

У горадзе Свіслач Гродзенскай вобласці 13–14 жніўня адбылася навукова-практычная канферэнцыя «Беларусь, Свіслацкі край і Эдвард Вайніловіч». Арганізатарамі канферэнцыі выступілі Інстытут гісторыі НАН Беларусі, Свіслацкі раённы выканаўчы камітэт, Рыма-каталіцкі касцёл у Беларусі і Міжнародны дзяржаўны экалагічны інстытут імя А. Сахарава БДУ. Форум быў прымеркаваны да 765-годдзя першай згадкі горада, а таксама рэгіянальнага свята «Свіслацкі кірмаш». Канферэнцыя працягнула добрую традыцыю навуковых мерапрыемстваў, падчас якіх даследчыкі разглядаюць мінуўшчыну пэўнага рэгіёна Беларусі праз прызму асобы вядомага беларускага грамадскага дзеяча і мецэната Эдварда Вайніловіча (на ілюстрацыі). Гэта ўжо сёмае рэспубліканскае мерапрыемства. Перад адкрыццём канферэнцыі адбылася прэзентацыя выставы «Духоўная спадчына Свіслачы» ў Свіслацкім гісторыка-краязнаўчым музеі. Асабліва ўразіла інсталяцыя макетаў страчаных храмаў Свіслаччыны, зробленых вучнямі Вучэбна-педагагічнага комплекса «Дабравольскі дзіцячы сад–сярэдняя школа» на аснове малюнкаў мастакоў Н. Орды і В. Карпызы.

• Месца выхаду: Мінск
• Дата выхаду: 2021-08-24
• Рэдактар: Дубовік Сяргей
• Выдавец: НАН РБ
• Copyright: НАН РБ
• Кнігазбор: Kamunikat.org