Праз 10 гадоў перавыдалі “Калевалу” ў перакладзе Якуба Лапаткі

2025-09-17 20:45

Выдавецтва «Папуры» перавыдала карэла-фінскі эпас «Калевала» ў перакладзе лінгвіста і пісьменніка Якуба Лапаткі, які за гэтую працу быў узнагароджаны фінляндскай прэміяй «Эпас». Таксама Якуб Лапатка стаў першым лаўрэатам перакладчыцкай Прэміі імя Карласа Шэрмана.

Упершыню «Калевала» па-беларуску выйшла ў лістападзе ў выдавецтве Змітра Коласа у 2015 годзе. На адрозненне ад шэрагу іншых перакладаў эпасу на замежныя мовы пераклад на беларускую быў зроблены непасрэдна з арыгіналу і выдатна перадае ўсе ягоныя адметнасці: і мову, і інтанацыю, і вобразны свет.

Якуб Лапатка яшчэ ў школьныя гады прыязджаў у Карэлію да сваякоў, дзе вывучыў карэльскую мову, што далей паспрыяла вывучэнню і фінскай мовы.

«Нешта падобнае да „Калевалы“ можна скласці і з беларускіх казак. Падабраць у іх парадак, пералажыць, магчыма, у вершы і звязаць адным героем, якім-небудзь кавалём, ці што... Народ жа вечны, вечнае яго мастацтва, вечныя і творцы песні і казкі. У такім перакананні ўмацоўвала мяне „Калевала“», — так пісаў Якуб Колас пасля знаёмствам з карэла-фінскім эпасам.

Купіць кнігу можна ў менскіх кнігарнях і, напрыклад, праз сайт Oz.by.

Крыніца: Міжнародны саюз беларускіх пісьменнікаў

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк