Удзел Камуніката ў сёлетнім Фестывалі PRADMOVA закончыць on-line сустрэча з Яраславам Іванюком

Сёлета Фонд Kamunikat.org наведаў усе гарады, у якіх праходзіў Міжнародны Фестываль Інтэлектуальнай Кнігі PRADMOVA.

У Вільні мы арганізавалі сустрэчу з Змітром Бартосікам «Ці магчыма беларусу перарасці свае даўнія страхі?» Аўтар кнігі з серыі Бібліятэка Свабоды «Забіць упалмінзага» расказаў пра ўзброены стыхійны супраціў сялян падчас пасляваеннай калектывізацыі і саветызацыі ў кнізе .

Акрамя таго, Зміцер Бартосік распавёў таксама невядомыя гісторыі часоў савецкай і нямецкай акупацыі, якія ўвайшлі ў кнігу «Быў у пана верабейка гаварушчы». У 2017 годзе гэтая кніга была ўганараваная Прэміяй Ежы Гедройца. Сёлета яе перавыдаў Фонд Kamunikat.org.

Мы таксама прэзентавалі культавую кнігу Сяргея Дубаўца «Майстроўня. Гісторыя аднаго цуду». У гэтай сустрэчы разам з аўтарам узялі ўдзел і сустваральнікі «Майстроўні» — Вінцук Вячорка, Сяргей Харэўскі і Сяргей Шупа.

Фонд Kamunikat.org у гэтым годзе перавыдаў гэтую кнігу, якую некаторыя называюць расповедам «як калядаванне прывяло да незалежнасуі».

Ня менш актыўны быў наш удзел у Фестывалі PRADMOVA ў Празе. 

Пражскую частку інаўгуравала дыскусія паводле кнігі Сяргея Навумчыка «Дзевяноста пяты» - «Ці мела Беларусь шанец вырвацца з арбіты Расеі і пайсці па шляху дэмакратыі пасля аднаўлення Незалежнасці?» Яе ўдзельнікамі былі: Сяргей Навумчык, аўтар цыкла кніг па найноўшай гісторыі Беларусі, апошняя – трэцяе перавыданне кнігі «Дзевяноста пяты» у выдавецтве Kamunikat.org, лаўрэат прэміі імя Алеся Адамовіча Беларускага ПЭНа, і доктар гістарычных навук, лаўрэат прэміі Гедройця Сяргей Абламейка.

Не без нас адбылася таксама PRADMOVA ў Познані, дзе пра свае кнігі «Забіць упалмінзага» і «Быў у пана верабейка гаварушчы» распавёў Зміцер Бартосік. 

Моцным акцэнтам варшаўскай PRADMOVY была таксама сустрэча з былым амбасадарам Польшчы ў Менску Лешэкам Шэрэпкам – аўтарам палітычнага трылера «Беларускі снайпер», ўтрыманага ў стылі найлепшых твораў Тома Клэнсі і Роберта Ладлума. Гэты раман выдатна адлюстроўвае сучасную беларускую рэальнасць, а таму дазваляе глыбей зразумець як сутнасць аўтарытарнага рэжыму, так і матывы тых, хто наважваецца рызыкаваць жыццём, каб яго перамагчы.

У Варшаве мы таксама двойчы прэзентавалі кнігу  Сяргея Дубаўца «Майстроўня. Гісторыя аднаго цуду».

Найперш з канцэртам «Беларуская Майстроўня – паветраны шар беларускай незалежнасці» выступіў Лявон Вольскі, які таксама падзяліўся са слухачамі сваімі ўспамінамі пра «Майстроўню». А на канец пра беларускае адраджэнне ў 80-я гады ХХ стагоддзя расказау яшчэ Сяргей Шупа.

Цяпер прыйшоў час на PRADMOVU on-line.