Ва Украіне выдадуць у перакладзе з беларускай артбук «Сож»

2025-12-11 15:33

Ва Украіне выходзіць артбук «Сож» — дыхтоўны фотаальбом з вершамі Алеся Плоткі і фотаздымкамі Алеся Пілецкага (Беларусь-2020) і Станіслава Крупажа (Украіна-2022). Усе сродкі ад продажу накіроўваюцца на падтрымку беларускага рэабілітацыйнага цэнтра «Ланка», таму гэтая кніга — спосаб падтрымаць добраахвотнікаў, якія аддалі сваё здароўе на вайне, і адначасова атрымаць артбук. Прыбыткі ад выдання арыгіналу (2023) таксама ішлі на падтрымку «Ланкі».

Перакладчык — вядомы беларусам Вячаслаў Лявіцкі, які ў тым ліку спрыяў з’яўленню ў Кіеве вуліцы Уладзіміра Караткевіча. Украінская версія атрымала назву «Сож» — у гонар ракі, што цячэ паміж дзвюма краінамі, сучасная фізічная і метафізічная мяжа, «шэрая зона» нашага часу.

Аўтар Алесь Плотка каментуе:

«Гэта яшчэ адно звяно ў гуманітарнай місіі, якую выконвае гэтая кніга, працяг арыгінальнай версіі. Калі я пачынаў як перакладчык, з кнігі Івана Сэмесюка, на прэзентацыях было багата ўкраінцаў, якія набывалі яе для сваіх беларускіх сяброў. А цяпер і мая кніга ва ўкраінскім перакладзе можа быць цікавая не толькі ўкраінцам, але і беларусам, якія шукаюць падобны падарунак. Пагатоў арыгінальнага беларускага выдання засталося меней за 10 працэнтаў».

Кніга выходзіць у выдавецтве «Коло» пры падтрымцы House of Europe. Папярэдняя замова працягваецца да 20.12 , потым кнігу можна будзе замовіць праз звычайныя інтэрнэт-кнігарні. Калі графікі адключэнняў электрычнасці не будуць пагаршацца, каманда праекта спадзяецца адправіць усе кнігі ўжо на зімовыя святы.

Перадзамова па Украіне (дастаўка ўключаная)

Зрабіце данат 1100 грн (або больш — на ваш меркаванне) на картку рэабілітацыйнага цэнтра «Ланка»:

5330 3752 4169 1688 (Yavorskyi Volodymyr)

У тэксце пераказу абавязкова ўкажыце: «Добровільна пожертва на статутну діяльність / Сож / ваш адрес або номер НП та контактний телефон».

Перадзамова ў іншыя краіны (дастаўка ўключаная)

Пераказ 25 еўра (або больш — на ваш меркаванне) на рахунак: IBAN: LT73 3250 0833 6008 6996 (Ales Plotka)

BIC/SWIFT: REVOLT21

У тэксце пераказу абавязкова пазначце:

«Сож / ваш адрас і кантактны тэлефон».

Крыніца: Будзьма беларусамі!

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк