Верш на Свабоду

Гэтую кнігу можна чытаць пад музыку — рэкамэндуем Джузэпэ Вэрдзі, арыю з опэры «Набука», — яна гучала на хвалях беларускай «Свабоды» ўвесь 2001 год да апошняга сьнежаньскага вечара: «Ты пяеш — і з табой маё сэрца пяе, о Свабода!..» «Freedom House» — міжнародная арганізацыя «Дом Свабоды» — у 2001 годзе аднесла Беларусь да несвабодных краінаў сьвету, адзіную з усёй Эўропы на пачатку ХХІ стагодзьдзя. І ўсё ж тады, прынамсі, пабольшала паэтычнай свабоды. 365 галасоў, новы верш штодня, напісаны спэцыяльна для Радыё Свабода, — неверагодная авантура, якая ня мае аналягаў і па сілах толькі паэтам. Магутныя перадатчыкі пасылалі электрамагнітны сыгнал у неба, ён адбіваўся ад іанасфэры і вяртаўся на беларускую зямлю, каб ізноў узмыць у нябёсы і з хуткасьцю сьвятла вярнуцца, і ў любым месцы — на дарозе, у хаце, ля возера, у Курапатах можна было ўключыць радыё і пачуць магічную вібрацыю — адчуваньні, здагадкі, сьцьверджаньні й пытаньні пра галоўную рэч, якая адзіная робіць чалавека годным суразмоўцам Бога. У 2001 годзе свабода гаварыла па-беларуску.

• Месца выхаду: Прага
• Дата выхаду: 2002
• Рэдактар: Аксак Валянцiна
• Выдавец: Радыё Свабодная Эўропа/Радыё Свабода
• ISBN: 0-929849-02-7
• Катэгорыя: Мастацкая літаратура
• Copyright: © 2002 by Радыё Свабодная Эўропа/Радыё Свабода
• Кнігазбор: Kamunikat.org, Каталёг БГТ, Каталёг MiOKB, Прыватны каталёг
• Інвэнтарныя нумары: BTH — 5117, MiOKB — 9286
• Дадатковая даведка: http://svaboda.org/ Кніга публікуецца тут за ласкавай згодай Радыё Свабодная Эўропа/Радыё Свабода