Выйшаў дэбютны паэтычны зборнік Марыі Бадзей

2023-12-26 17:03

Выдавецкая ініцыятыва “Пфляўмбаўм” выпусціла дэбютны зборнік вершаў Марыі Бадзей “Мёд і дым”. Кніга неўзабаве мусіць з’явіцца ў продажы.

Дызайн вокладкі зрабіла Лізавета Дубінчына.

“Вершы Марыі Бадзей нібыта выраслі з нашай зямлі, поўняцца галасамі яе дрэў, пахамі і колерамі паравінаў года. Яны зацягваюць углыб, як вада, але ў гэтай вадзе ― не толькі нашае тут, у ёй ― адбіткі сусвету. Мёд для слыху гэтыя вершы, і дым для сэрца”, ― піша пра паэзію Марыі перакладчыца і паэтка Вольга Гронская.

“«Мёд і дым» — гэта кніга-кантата, у якой словы маюць смак, колер і пах. Паэзія-рака, што нясе косткі традыцыі і памяці, якія сыходзяць у зямлю і ўваскрасаюць на ёй арэхамі, кукурузай, цыкорыяй і бэзам. Зборнік-люстэрка, з якога ў вочы чытачу глядзіць чалавек міфу”, — адгукаецца паэтка Ганна Шакель.

Марыя Бадзей — паэтка, выкладчыца, рэдактарка. Нарадзілася ў 1997 г. у Ваўкавыску. Скончыла Ліцэй БДУ і філалагічны факультэт БДУ, вывучала філасофію і літаратуру ў Беларускім калегіуме, вучылася ў Школе маладога пісьменніка. Рэдактарка культурніцкага праекта wir.by. Друкавалася ў часопісах «‎Маладосць»‎ і «‎Дзеяслоў»‎, зборніках паэзіі «Scriptorium» і «Анталогія паэтак. Выбранае Вальжынай Морт». Вершы перакладаліся на латышскую, нямецкую і ўкраінскую мовы. Лаўрэатка прэміі «‎Залаты апостраф»‎ (2018) і конкурсу дэбютных рукапісаў «‎Неба з сабой» (2020).‎ Удзельніца паэтычных фестываляў у Мінску і Берліне.

Фота Алены Казловай

Крыніца: Міжнародны саюз беларускіх пісьменнікаў

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк