Забаранілі яшчэ 31 кнігу, у тым ліку вершы беларускіх паэтаў

Асаблівую ўвагу выклікае кніга «Вот они, а вот мы. Белорусская поэзия и стихи солидарности. Составитель В. Коркунов», якая пабачыла свет у 2021 годзе ў Расеі.

У анатацыі гаворыцца, што кнігу склалі вершы сучасных беларускіх паэтаў у арыгіналах і перакладах, а таксама тэксты салідарнасці, якія публікаваліся на партале «полутона» (паўтоны) у жніўні 2020 году на знак падтрымкі пратэсных падзеяў у краіне. Марафон #поэтыбеларуси цягнуўся тры тыдні, ягоныя вынікі (26 беларускіх аўтараў/-ак, 8 перакладчыкаў/-ыц, 4 паэты/-кі з Ураіны і Ізраілю) — прадтсаўленыя ў гэтай кнізе. Складальнік — Уладзімір Каркуноў.

«Цікава, што ў ім [спісе] апынулася і адна кніжка паэзіі, пра якую мала хто ведае — зборнік беларускай паэзіі ў расейскіх перакладах і вершаў салідарнасьці „Вот они, а вот мы“ (2021). Назву ёй даў радок майго верша, напісанага ў жніўні 20-га, а сам гэты верш надрукаваны ў зборніку ў перакладзе Генадзя Канеўскага», — пракаментаваў навіну ў фэйсбуку пісьменнік Альгерд Бахарэвіч.

Сярод іншага ў кнізе ёсць вершы Вальжыны Морт, Вольгі Гапеевай, Астапа Слывіньскага, Андрэя Хадановіча, Юлі Цімафеевай, Дзмітрыя Строцава і многіх іншых беларускіх літаратараў.

Агулам у спіс дадалі 31 кнігу, піша «Рэформ», у тым ліку «Таемную гісторыю» Доны Тарт, «Жыццё на продаж» Юкіа Місімы, «Нявідку» Чака Паланюка, «Трыццатае каханне Марыны» Уладзіміра Сарокіна, «Семя жадання» Энтані Бёрджэса.